Fara í efni

Glýsemíugildi og blóðsykur

27.11.2018

Öldum saman hefur brauð talist einn af grunnþáttum góðrar næringar. Þessi undirstaða næringar mannkyns í þúsundir ára virðist þó undanfarin ár hafa fengið á sig neikvæðan stimpil þeirra sem vilja grennast. Kannanir hafa sýnt að fólk velji að taka brauð af matseðlinum vegna kolvetnisinnihaldsins án þess að gera sér grein fyrir hversu mikilvægu hlutverki brauð gegnir, til að mynda í baráttunni gegn háu kólesteróli og hjartasjúkdómum. Það sem máli skiptir er þegar á að grenna sig er að borða rétta brauðið, með réttu kolvetnunum. Kolvetni er efnasamband kolefnis, súrefnis og vetnis og í matvælum eru algengustu kolvetnin sterkja, trefjar og sykrur. Hröð blóðsykursaukning hefur áhrif á efnaskipti okkar og stuðlar að umbreytingu kolvetna í fitu sem safnast getur utan á okkur. Hægt er að hafa mikil áhrif á hraða blóðsykuraukingu með mismunandi tegundum kolvetna. Glýsemíugildi kolvetna er einn mælikvarði á hversu hratt þau auka blóðsykur okkar. Sem dæmi má nefna glúkósa sem hefur hátt glýsemíugildi, eða 100, en ef glúkósa er neytt hækkar blóðsykur hratt. Glúkósi er einfalt kolvetni og því einfaldari sem þau eru því hærri er glýsemíugildið. Í mikið unnum matvörum eins og hvítum hrísgrjónum og matvörum sem innihalda hvítan sykur er mikið af einföldum kolvetnum.

Staðreyndin er hinsvegar sú að líkaminn þarfnast kolvetna sem eldsneytis en með því að einbeita sér að flóknari kolvetnum er hægt að tryggja mataræði sem heldur blóðsykri og insúlíni stöðugu. Hvernig kolvetni þú borðar skiptir meira máli en hve mikið af þeim þú borðar.

Hér á eftir er listi yfir glýsemíugildi ýmissa brauðtegunda:
Fransbrauð 95
Rískökur 72
Heilhveitibrauð 71
Hrökkbrauð 64
Hafrakex 57
Brauð með grófu korni 46
Rúgbrauð 30-40

Af þessum lista má sjá að besta veganestið sem þú gefur sjálfum þér inn í daginn er að fá þér gróft brauð í morgunmat. Áleggið skiptir að sjálfsögðu líka máli. Hvernig væri að prófa eina sneið með til dæmis banana (41) og hnetusmjöri (14) ?